ვახტანგ ჭელიძე - ქართველი მწერალი და მთარგმნელი, დაიბადა 1917 წლის 10 აპრილს სოფ. ბახვში, ოზურგეთის რაიონი. 1941 წელს დაამთავრა თბილისის სახელმწიფო უნივერსიტეტის ფილოლოგიის ფაკულტეტი, დასავლეთ ევროპის ენისა და ლიტერატურის განყოფილება (ინგლისური ენა და ლიტერატურა). 1948 წლიდან 1952 წლამდე მუშაობდა საბლიტგანის მთავარ რედაქტორად. 1955-57 წლებში იყო ჟურნალ ,,ნიანგის'' მთავარი რედაქტორი.
1963 წელს, პირველად მრავალი წლის შემდეგ, გამოიცა ჟურალი ,,ცისკარი'', რომლის ერთ-ერთი დამაარსებელი და პირველი რედაქტორი (1963-67) ვახტანგ ჭელიძე გახლდათ. 1967-73 წლებში იყო გამომცემლობა ,,საბჭოთა საქართველოს'' დირექტორი. 1973 წელს ვახტანგ ჭელიძე სათავეში ჩაუდგა გაზეთ ,,ლიტერატურულ საქართველოს'', რომლის უცვლელი რედაქტორი იყო 1985 წლამდე. ამავე პერიოდში მან დააარსა ჟურნალი ,,ხომლი''. 1985-91 წლებში დირექტორობდა გამომცემლობა ,,ნაკადულს''.
ვახტანგ ჭელიძე იყო კულტურის სამინისტროს ხელოვნების საქმეთა სამმართველოს უფროსი, კინოსტუდია ,,ქართული ფილმის'' მთავარი რედაქტორი, სხვადასხვა სარედაქციო-საგამომცემლო, ჟურნალ-გაზეთების სარედაქციო საბჭოს წევრი.
მინიჭებული აქვს საქართველოს სახელმწიფო პრემია ,,საბა''-2003 წ. ქართული ლიტერატურის განვითარებაში შეტანილი განსაკუთრებული წვლილისათვის. 1978 წელს კი ივანე მაჩაბლის სახელობის პრემია. 1967 გახდა ხელოვნების დამსახურებული მოღვაწე.
გარდაიცვალა 2005 წლის 11 ივნისს. დაკრძალულია დიდუბის პანთეონში
